He haupū pūtea nā NZOA me Te Māngai Pāho kua whakaritea ki te waihanga i ngā hōtaka Scripted, Non-Fiction rānei ka tuhia ki te reo Māori, e hāngai ana ki te ao Māori rānei.

Kua pāhōtia ngā kaitono i whai hua i te haupū pūtea o Irirangi Te Motu | NZ On Air – Te Māngai Pāho Reo Māori Co-Fund ki te waihanga hōtaka e kite atu ai te Aotearoa ā mohoa noa nei.

He $8m te wāriu o te haupū pūtea, ā, nō te marama o Akuhata 2024 ka tonoa atu ai ngā kaupapa Scripted, Non-Fiction hoki e hāngai ana ki te ao Māori mō te iwi katoa – ka mutu, me whai kia 30 paihēneti te noho o te reo Māori ki roto i te kaupapa.

Hei tā te Kairīwhi Kaiwhakahaere Tahua Pūtea o Irirangi te Motu, a Kelly Davis, “Kua hua mai te haupū pūtea nei i tō mātou hiahia kia whai whakaaro, kia whakawhanake anō hoki i te tuakiritanga o Aotearoa mā roto mai te whakarewanga o te reo Māori, o te ahurea Māori anō hoki. E hīkaka ana mātou kia mātaki i ēnei hōtaka whakahirahira. Katoa ēnei hōtaka ka whai whakaaro ki te whānuitanga o ō te Māori whakaaro, me te aha, ka whai pānga ki te tini tāngata huri noa i Aotearoa.”

E iwa ngā tono Scripted, Non Scripted hoki i tau atu ki tēnei rauna – e toru ngā tono Scripted, kotahi anō hoki te tono Non Fiction i whai pūtea. E toru anō ngā tono Scripted i whai pūtea whakawhanake, ka riro i a rātau te $82,000, me te mōhio tonu ka hua mai he kaupapa whakahirahira anō mō ngā tini kaimātakitaki huri i Aotearoa.

Hei tā te Kaihautū o Te Māngai Pāho, a Larry Parr, “Nā te haupū pūtea nei i whai huruhuru ngā kaupapa hihiri, whai whakaaro nui anō hoki ki te kounga o te reo Māori, ka mutu, he kaupapa ka whai pānga ki te tini tāngata. He koanga ngākau ki te kite i te auaha o ngā rautaki reo Māori kua waihangatia e ēnei kaihautu kia whai whakaaro ki ngā taumata reo Māori rerekē huri noa i Aotearoa, me te aha, ko te whakaputanga motuhake o te reo Māori kia Māori tonu ia, kia whai pānga hoki ia ki te iwi katoa.”

Ka whai pānga te terenga hōtaka a Baddies ki te Aotearoa onāianei, ki te hunga e kīia ana he Kiwi rātou, me te aha, he wairua whakaingoingo tōna. He hōtaka tēnei mō te rangatahi, ā, he hōtaka a Baddies e kōrero ana mō tētahi rangatahi pūmanawa, hanga mokemoke hoki, e 12 noa iho te pakeke ka whakatauria mēnā ka whakaae ia kia tū hai tino baddie, kia whakarerekē rānei i tōnā ao i te pāhuatanga o tētahi hopuni mō ngā rangatahi hianga e tētahi tira kaiā.

Ka toro atu te hōtaka a This is Home ki ngā take o te wā, ki ngā hononga tāngata hoki i te ao whai muri atu i te mate kowheori, ā, he terenga hōtaka pukuhohe, whakaari anō hoki tēnei mō Whakaata Māori me Sky Open. I a Nina rāua ko Kara e ngana ana ki te whai oranga ahakoa te utu nui ki te whai whare, ki te whai pūtea e kite atu ai he oranga hoki, me whai māramatanga te tokorua - tuakana, teina - nei ki a rāua anō, i a rāua ka hoki ki tō rāua whānau, noho atu ai.

Hei whakapāhōtanga mō te tau 2025 me te whakamaumaharatanga o te 80 tau nō te mutunga o te pakanga tuarua o te ao, he pakipūmeka whakaari a KIWI mō TVNZ+ me Whakaata Māori ka whai i tētahi hoia nō te Hokowhitu a Tū, a Lance Sergeant Haane Manahi, i a ia i te raki o Awherika e whakarau ana i tētahi pā, ahakoa e pūhia ana ia e ngā pū mihini, kia mauhere hoki i tētahi ohu tāngata 300 te rahi o te tiamani me te itāriana.

Mō te taha ki ngā kaupapa Non-Fiction, ka hoki mai te pakipūmeka a Origins 3 mō TVNZ1 me TVNZ+. Ka whai a Scotty Te Manahau Morrison i ngā terenga wai o ngā waka ki Aotearoa i mua tonu i tō rātou paringa mai ki uta.

Ka ō katoa ngā hōtaka Scripted e toru, te hōtaka Non-Fiction me ngā kaupapa Scripted whakawhanake e toru ki te rahinga pūtea o te $8,054,564.

Ngā whakatau

Katoa katoa te haupū pūtea he mea wehe 50/50 e Te Māngai Pāho me Irirangi te Motu.

Katoa ngā herenga pūtea he mea whiriwhiri i ngā tono i tau mai ki a mātou, ka mutu, me mana ngā kirimana i te wā e tika ana. Ka putuputu te tuku i te pūtea, kia ea rā ngā here kirimana. Ko ngā pūtea kua herea engari kāore anō kia mana ki roto i te wā e tika ana, ka whakahokia mai, ka wherawherahia ki rauna pūtea anō.

Kaupapa Whakaari:

• KIWI (working title), 1 x 80’, nā Wheke Group hei mātakitaki i TVNZ+ me Whakaata Māori, tae atu ki te $1,095,962.
• This is Home, 6 x 24’, nā 787 Media hei mātakitaki i Whakaata Māori me Sky Open, tae atu ki te $2,233,682.
• Baddies, 6 x 22’, nā Brown Sugar Apple Grunt Productions hei mātakitaki i TVNZ+ me TVNZ2, tae atu ki te $3,330,565.

Kaupapa Kōrero Pono

• Origins 3, 2 x 44’, nā Scottie Douglas Productions hei mātakitaki i TVNZ1 me TVNZ+, tae atu ki te $1,312,355.