Neke atu i te $6.5 ka tukuna e Irirangi Te Motu me Te Māngai Pāho ki ngā kaupapa reo Māori

Kua pānuitia e Irirangi Te Motu|NZ On Air me Te Māngai Pāho ngā kaitono kua angitu i te rauna tuku pūtea ngātahi tuarima, kua riro i ngā kaupapa e ono reo rua, matatau anō hoki, te pūtea tautoko kia tae ki te $6,623,102 miriona tāra.

I aro te tukuhanga o te pūtea nei ki ngā kaupapa nui te kounga, ki ngā kaupapa kua whakaritea ngā tuhinga, ki ngā kaupapa tūturu anō hoki e whakatairanga nei i ngā taumata rerekē o te reo Māori e hiwatia ai, e whakaakotia ai hoki i ngā kaimātakitaki i ngā paepāho rau.

Mā Whakaata Māori, ko End of the Valley tētahi terenga whakaari reo Māori e titiro ana ki ngā whakawhitinga kōrero mō ngā kerēme whenua me ngā uauatanga o te piripono me te ora. I te terenga nei, ka whāia te kiritoa, a Kaea Williams, i a ia e wete ana i ngā kōrero huna a Ngāti Kiokio, me te matenga o tana pāpā kāore ia i mōhio.

E auraki ana ki TVNZ 1, i The Casketeers: Life and Death Around the World, ka whai haere i a Kaiora rāua ko Francis Tipene i a rāua e tūhura ana i ngā tikanga tangihanga o ngā ahurea rerekē huri noa i te ao.

Kia hōkai atu ki te whare kori MMA toa whakaihuwaka, ki a CKB, he terengapūmeka taiapa-kore a Relentless mā TVNZ+ e whai nei i ngā kaimamau 10 i a rātou e tūmanako kia whai wāhi atu ki te kapa o City Kickboxing. Ka whāia te terenga 12 wiki te roa, i te tirohanga o ēnei kaimamau, i a rātou e ako ana kei taumata kē atu ngā āhuatanga o reira; he whare wehikore e kaimamau ai, e tangata ai te tangata.

Ka hoki anō a The Drawing Board mō te terenga tuarua ki Whakaata Māori, e whakaatu ana i ngā kaupapa whakahoahoa huri noa i te motu e arahina ana e te Māori, kua whakahoahoatia rānei e te Māori – e whakatakihia ana e Derek Kawiti (Ngāti Hine, Ngāpuhi, Tūhoe, Ngāti Porou), Ahorangi Whakahoahoa i Te Herenga Waka.

E rua ngā wāhanga kei tēnei pakipumeka mā Whakaata Māori, kei Motuhaketanga, e whai ana i ngā wāhine tokotoru i a rātou e whakarite ana ki te wehe i te whare herehere, ngā wero ka tae ki mua i ō rātou aroaro me ō rātou ara kia tū tangata ai rātou i tō rātou motuhaketanga.

Ko te awa o Waiapu te ia-tuku matua me te ngākau o te horanuku o Ngāti Porou. Ka pāhotia a Why Apu? mā ngā paepāho ipurangi anake, ā, ka titiro ki ngā māuiuitanga ki te taiao o Te Tairāwhiti, me te pakanga mō te oranga tonutanga o te taiao, mō ngā uri whakaheke anō hoki.

“E hiamo ana a Irirangi Te Motu e whakaputahia tonutia ana e tō mātou mahi ngātahitanga ki a Te Māngai Pāho ngā kaupapa reo rua auaha mā ngā kaimātakitaki. Ka whakaaturia kairangitia e ngā kaupapa e ono nei te paeroa o ngā reo me ngā tirohanga, me te whakamuramuratia i te whai hua o te reo Māori ki ngā kaimātakitaki katoa,” tā te Tumu Whakarae o Irirangi Te Motu, Cameron Harland.

“E whakahīhī ana a Te Māngai Pāho ki tēnei mahi ngātahitanga ki a Irirangi Te Motu me ngā āheinga e tukuna ana kia pāhotia ngā kōrero Māori ki te horanga kaimātakitaki ngā kaupapa e ono kua whai pūtea tautoko e kaha kawe nei i ngā tirohanga Māori, ā, puta noa, ka whakarangatiratia te reo Māori,” tā te Kaihautū o Te Māngai Pāho, Larry Parr.

Ngā kōiriiri tukunga pūtea:

Ka whakawehea te tapeke o ngā tono pūtea mā tōna 50/50 i waenganui i a Te Māngai Pāho me Irirangi Te Motu.

End of the Valley, 6 x 26 miniti, Miro Productions Ltd mā Whakaata Māori, kia tae ki te $2,359,987.

The Casketeers: Life and Death Around the World, 6 x 44 miniti, Great Southern Television Ltd mā TVNZ 1, kia tae ki te $1,537,537.

Relentless, 9 x 22 miniti, Fire Fire Ltd mā TVNZ+, kia tae ki te $1,000,668.

The Drawing Board S2, 8 x 25 miniti, Faultline Films Ltd mā Whakaata Māori, kia tae ki te $669,521.

Motuhaketanga , 2 x 52 miniti, Black Iris Ltd mā Whakaata Māori, kia tae ki te $539,660.

Why Apu?, 6 x 20 miniti, Te Amokura Productions Ltd mā ngā paepāho ipurangi, kia tae ki te $515,729.